Бүгін, 08:50
Ведомство мәліметінше, министрдің сапары алдын ала жоспарланған тексеру форматында емес, тосын бақылау ретінде ұйымдастырылған.
Қазақстанның Қорғаныс министрі, генерал-майор Айдос Мырзахметов Ақмола гарнизонында орналасқан әскери бөлімдердің біріне барып, оның тыныс-тіршілігімен танысты, деп хабарлайды kznews.kz.
Оның барысында әскери бөлімдегі қызметтің ұйымдастырылуы, әскери қызметшілердің күнделікті жағдайы және бөлімнің материалдық-техникалық базасының жай-күйі қаралды.
Айдос Мырзахметов алдымен әскери қызметшілер орналасқан нысандарды аралап, казармалардың жағдайын тексерді. Әскери қызметкерлердің тұруына жасалған жағдайға, тазалық пен санитарлық талаптардың сақталуына, сондай-ақ қажетті тұрмыстық жағдайлардың қамтамасыз етілуіне назар аударылды.
Сонымен қатар министр әскери бөлімнің инфрақұрылымын аралап, нысандардың қазіргі жағдайын бағалады. Әскери қызметшілердің қауіпсіз әрі қолайлы жағдайда қызмет атқаруы үшін қажетті талаптардың орындалуы да бақылауға алынды.
Тексеру барысында анықталған мәселелер бойынша жауапты лауазымды тұлғаларға нақты тапсырмалар берілді. Негізгі міндеттердің бірі – әскери қызметшілердің тұрмыс жағдайын одан әрі жақсарту, әскери бөлімдегі инфрақұрылымды тиісті деңгейде ұстау және анықталған кемшіліктерді жедел жою.
Қорғаныс министрлігінің мәліметінше, мұндай тексерулер әскери бөлімдердегі қызметті ұйымдастыру сапасын арттыруға, тәртіп пен талаптардың сақталуын бақылауға, сондай-ақ әскери қызметшілерге жасалған жағдайды жақсартуға бағытталған.
