Бүгін, 10:17
Танымал асаба Сабыржан Түзелбаев 33 жыл бойы жылқы бағып, кейін қоғамда кеңінен талқыланған іске байланысты ақталған қария Рахат Сәрсеновке жылқы сыйлайтынын мәлімдеді, деп хабарлайды kznews.kz.
Асаба өз шешімі жөнінде әлеуметтік желідегі парақшасында жазып, қарияға қолдау білдіргісі келетінін жеткізді. Оның айтуынша, сыйлық жуық арада иесіне табысталады.
«Аз да болса көптей көріңіз, аға. Бұйырса, жақын арада жеткізіп беремін. Бәріміз пендеміз, періште көкте ғана. Еліміз аман, жұртымыз тыныш болсын. Қазақ елі, қателігім болса, кешірім сұраймын», – деп жазды Сабыржан Түзелбаев.
Айта кетейік, соңғы күндері асабаның есімі әлеуметтік желілерде жиі талқыланып жатыр. Бұған оның тойлардың бірінде айтқан әзілдері мен қонақтарға қарата сөйлеген сөздері себеп болған.
Желіде тараған бейнежазбаларда асабаның түрлі мамандық иелеріне қатысты айтқан қалжыңдары көпшіліктің сынына ұшырады. Атап айтқанда, ол өрт сөндірушіге қарата «Өрттің көп болсын» деп әзілдеген. Сондай-ақ дене шынықтыру пәнінің мұғалімі мен базарда қауын-қарбыз сататынын айтқан қонаққа байланысты айтқан сөздері де әлеуметтік желі қолданушылары арасында қызу талқыланды.
Көпшілік мұндай әзілдердің орынсыз екенін айтып, адамның кәсібі мен еңбегін келемеждеуге болмайтынын алға тартты. Осыған байланысты Сабыржан Түзелбаевтың әрекеті қоғамда әртүрлі пікір туғызды.
Осы жағдайдан кейін асаба Рахат Сәрсеновке жылқы сыйлайтынын жариялап, көпшілікке үндеу жасап, жұрттан түсіністік пен кешірім сұрады.
