Белгілі актер, Қазақстанның халық артисі Асанәлі Әшімовтың екінші жары Бағдат Әшімова актердің бірінші әйелі Майра апайдың ауыр дерт салдарынан өмірден өткенін айтып, оның соңғы сәттері туралы естеліктерімен бөлісті. Бұл туралы ол Stan.kz тілшісіне берген сұхбатында мәлімдеді, деп хабарлайды kznews.kz.
Бағдат Әшімованың айтуынша, Майра апай сирек кездесетін склеродермия атты дертке шалдыққан. Бұл – адам ағзасындағы барлық ішкі мүшелердің біртіндеп зақымдалып, жұмыс істеуін тоқтататын өте ауыр және сирек кездесетін ауру. Дәрігерлердің сөзіне сенсек, бұл диагноз мыңнан бір адамға ғана қойылатын ерекше жағдай.
«Майра апа 1993 жылы кетті. Бір-екі жылдай ауырған. Бүкіл ішкі ағза біртіндеп желіне бастайды екен. Өте тырысыпты, алып қалуға. Мәскеудегі Кремль ауруханасына да апарған. Соңында Германияға да жеткізген. Бірақ аппаратпен елге алып келе жатқанда оянбай қалған», – дейді Бағдат Әшімова.
Сол кез Асанәлі Әшімов үшін де өте ауыр кезең болған. Өйткені дәл сол уақытта актер аппендицит диагнозымен ауруханада жатқан. Операциядан кейінгі қалпына келу кезеңінде жатқан Әшімовтің ауруханадан шығуына рұқсат берілмеген.