Бүгін, 14:43
Иранның Жоғарғы көшбасшысы, аятолла Әли Хаменеинің қаза тапқаны ресми түрде расталды. Бұл туралы Иранның мемлекеттік ақпарат агенттігі IRNA хабарлады, деп жазады kznews.kz.
Агенттік мәліметінше, Ислам революциясының жетекшісі сенбі, 28 ақпан күні таңертең жасалған шабуыл салдарынан көз жұмған.
«Ислам революциясының Ұлы жетекшісі, мәртебелі аятолла Хаменеи сенбі күні таңертеңгі шабуыл нәтижесінде шейіт болды», – делінген ресми хабарламада.
Ирандық бұқаралық ақпарат құралдарының дерегіне сәйкес, ол қаза тапқан сәтте қызметтік міндеттерін атқарып, жұмыс орнында болған.
Ел билігі республика аумағында 40 күндік жалпыұлттық аза тұту жариялады. Сондай-ақ 7 күн мемлекеттік демалыс күні ретінде белгіленді.
Әли Хаменеи 86 жаста еді. Ол Иранның Жоғарғы көшбасшысы қызметін 1989 жылдан бері атқарып келген. Бұған дейін сегіз жыл бойы ел президенті болған.
