12 наурыз, 2026
Иранның жаңа Жоғарғы көшбасшысы болып тағайындалған Моджтаба Хаменеи қызметке кіріскеннен кейін алғаш рет ресми мәлімдеме жасап, елдің ұстанымы мен алдағы қадамдары туралы айтты. Бұл туралы ирандық БАҚ хабарлайды, деп жазды kznews.kz.
Моджтаба Хаменеи өз сөзінде Иран қаза тапқандар үшін кек алудан бас тартпайтынын және халықты бірлікке шақыратынын мәлімдеді.
– Иран шейіт болған азаматтар үшін кек алудан бас тартпайды. Біз үшін ең маңыздысы – халықтың бірлігі, – деді ол.
Оның айтуынша, Ормуз бұғазын жабу мүмкіндігі әлі де қарастырылып жатыр. Сонымен қатар қарсылас әлсіз тұстарда жаңа бағыттар ашу мәселесі де зерттелуде.
Хаменеи аймақтағы барлық америкалық әскери базалар жабылуы тиіс екенін айтты. Оның сөзінше, егер бұл талап орындалмаса, олар соққы нысанасына айналуы мүмкін.
– Аймақ елдері өз ұстанымын анықтауы керек. АҚШ-тың қауіпсіздік туралы уәделері жалған болып шықты. Егер америкалық базалар жабылмаса, олар заңды нысанаға айналады, – деді Иранның Жоғарғы көшбасшысы.
Сондай-ақ ол Тегеран қарсы тараптан өтемақы талап ететінін жеткізді. Егер өтемақы төленбесе, Иран олардың активтерінен қаражат алу немесе мүлкіне залал келтіру жолдарын қарастыруы мүмкін екенін айтты.
Моджтаба Хаменеи Иранның көрші елдерге қарсы емес екенін, негізгі мақсат аймақтағы америкалық әскери нысандар екенін атап өтті.
Оның сөзінше, АҚШ пен Израиль жасаған шабуыл салдарынан оның жұбайы мен әпкесі қаза тапқан.
Сондай-ақ Хаменеи өзінің Жоғарғы көшбасшы болып сайланғанын алғаш рет теледидар жаңалықтарынан білгенін айтты.
