Бүгін, 08:25
АҚШ президенті Дональд Трамп сенбі күні айтқан сөзінде Иранға қарсы «өте ауыр соққы» жасалатынын мәлімдеп, қақтығыстың жаңа кезеңге өткенін аңғартты. Бұл мәлімдеме Иран президенті Масуд Пезешкианның Вашингтон талап еткен «сөзсіз берілу» үндеуін ашық түрде жоққа шығарған сөзінен кейін жарияланды, деп хабарлайды kznews.kz.
Трамп Truth Social парақшасында: «Бүгін Иранға өте ауыр соққы жасалады!» деп жазды. Сондай-ақ ол осы уақытқа дейін нысанаға алу жоспарына кірмеген аумақтар мен адамдар топтары енді «толық жойылу мен сөзсіз өлім қаупі» аясында қарастырылып жатқанын айтты.
Бұған дейін Иран президенті Масуд Пезешкиан мемлекеттік телеарна арқылы жасаған үндеуінде АҚШ-тың «сөзсіз берілу» талабын «өздерімен бірге көрге ала кететін қиял» деп атаған. Сонымен бірге ол Иранға шабуыл көрші елдердің аумағынан жасалмаса, Тегеранның оларға қарсы соққы жасамайтынын жеткізді. Пезешкиан көрші мемлекеттерге Иран әрекеттерінен зардап келгені үшін кешірім де сұраған.
Ақ үй Иранға қарсы әскери операцияны 28 ақпанда Израильмен бірге бастаған. Содан бері Трамп Иранның толық тізе бүгуін талап етіп қана қоймай, елдің келесі жоғарғы жетекшісін айқындау ісіне де АҚШ араласуы керек екенін ашық айтып жүр. Reuters дерегінше, ол келіссөзден гөрі Иранның әскери-саяси құрылымын толық әлсіретуге басымдық беретінін байқатты.
Қақтығыс салдары Таяу Шығыспен шектелмей, әлемдік нарыққа да әсер ете бастады. Reuters мәліметіне қарағанда, соғыс басталғалы мұнай мен газ бағасы күрт өсіп, Ормуз бұғазы маңындағы тұрақсыздық жаһандық энергия тасымалына қауіп төндіріп отыр. АҚШ-та бензиннің орташа бағасы да бір апта ішінде 27 центке қымбаттап, бір галлоны 3,32 долларға жеткен.
Осы арада АҚШ Мемлекеттік департаменті Таяу Шығыстағы азаматтарын эвакуациялау жұмысын жалғастырып жатыр. Ресми мәлімет бойынша, оннан астам чартерлік рейс ұйымдастырылып, мыңдаған америкалық қауіпсіз аймаққа көшірілген, ал тәулік бойы істейтін жедел топ 16 мыңнан астам адамға көмек көрсеткен.
