Бүгін, 10:20
Иран билігі елдің бұрынғы Жоғарғы көшбасшысы Әли Хаменеидің өліміне қатысы бар тұлғалардың жауапкершіліктен құтылмайтынын мәлімдеді, деп хабарлайды kznews.kz.
Иранның Ұлттық қауіпсіздік жоғары кеңесінің хатшысы Мохаммад-Багер Зульгадрдың айтуынша, Хаменеидің және өзге де қаза тапқандардың өліміне қатысты іс жабылмайды және кінәлілер тиісті уақытта жазаланады.
«Әли Хаменеи мен Иранның өзге де шәһидтерінің жазықсыз төгілген қаны үшін кек алу туралы іс ашық. Бұл қылмыстарға кінәлілер міндетті түрде жауапқа тартылады», – деді ол X әлеуметтік желісінде жарияланған мәлімдемесінде.
Иран мемлекеттік ақпарат құралдарының мәліметінше, Әли Хаменеймен қоштасу рәсімі 4 шілдеде Тегерандағы «Мосалла» кешенінде басталады. Одан кейін қаралы шаралар Құм және Мешхед қалаларында жалғасып, 9 шілдеде Мешхедте жерлеу рәсімі өтеді. Сонымен қатар Ирактағы шииттер үшін қасиетті Наджаф пен Кербела қалаларында да еске алу шаралары ұйымдастырылады.
Иран Сыртқы істер министрлігінің ресми өкілі Исмаил Багаидің мәліметінше, қаралы рәсімдерге ондаған мемлекет пен көптеген діни көшбасшылардың қатысуы күтілуде. Осыған байланысты іс-шараларды үйлестіру үшін Иранда арнайы ұлттық штаб құрылған, ал Ирак билігі де жеке үйлестіру орталығын іске қосқан.
Әли Хаменеи 2026 жылғы 28 ақпанда АҚШ пен Израильдің Иранға жасаған бірлескен әуе соққысы кезінде қаза тапқан болатын. Жерлеу рәсімі аймақтағы әскери қақтығыстар мен кейінгі келіссөздерге байланысты бірнеше айға кейінге шегерілген
