Қазақстандықтар банк қосымшасының жұмысында ақаулар пайда болғанын айтып, шағым түсіруде, деп хабарлайды kznews.kz.
5 қаңтар күні таңертеңнен бастап қолданушылар Halyk SuperApp қосымшасына кіре алмай отырғанын жеткізді. Клиенттердің айтуынша, сервиске кіру немесе қандай да бір операция жасау кезінде қате туралы хабарлама шығады.
"Бізге көптеген сұраныс келіп түсуде. Сәл кейінірек қайтадан байқап көріңіз. Қате орын алды. Сұранысты кейінірек қайталаңыз", – деген ескерту банк клиенттерінің экранында пайда болған.
Halyk Bank өкілдері қосымшаның уақытша істен шығуына техникалық жұмыстар себеп болғанын түсіндірді.
"Қазіргі уақытта жүйеге түсіп жатқан жүктеменің артуына байланысты қосымшада уақытша техникалық шектеулер байқалуда. Банктің мамандар командасы сервистердің тұрақты жұмысын қалпына келтіру және жүйені тұрақтандыру бойынша қажетті жұмыстарды жүргізіп жатыр. Шектеулерді мүмкіндігінше қысқа мерзімде жою және қызметтерге тұрақты қолжетімділікті қамтамасыз ету үшін барлық шаралар қабылдануда. Клиенттеріміз бен серіктестерімізге түсіністік танытқандары үшін алғыс айтамыз", – деп мәлімдеді банк баспасөз қызметі.
