Stan.kz басылымының жазуынша, қайғылы оқиғаға биыл 15 жыл толады. Осыған орай сол күні Таразда не болғанын және құқық қорғау қызметкерлерінің қарулы шабуылды қалай тоқтатқанын еске түсірейік.
Қарулы шабуыл қалай басталды?
Тергеу материалдарына сәйкес, 2011 жылғы 12 қарашадағы шабуыл алдын ала жоспарланған.
Қылмысты жасаған Мақсат Қариев сол күні өзін «Қазақтелеком» қызметкері ретінде көрсетіп, арнайы киіммен қала көшелерінде жүрген.
Шамамен сағат 11:00-де ол өзін бақылап жүрген Ұлттық қауіпсіздік комитетінің екі қызметкеріне оқ атқан. Салдарынан Сергей Касьяненко мен Мұхтар Халиев қаза тапты.
Осыдан кейін Қариев қарумен қорқытып, Mazda 626 автокөлігін тартып алған.
Сағат 11:35 шамасында ол «Маке» қару-жарақ дүкеніне басып кірген. Шабуыл кезінде дүкен күзетшісі мен сол жерде болған келуші оққа ұшты.
Қылмыскер дүкеннен бірнеше қару мен оқ-дәріні алып кеткен.
Тараз көшелерінде атыс басталды
Қарулы адам дүкеннен шыққаннан кейін де қылмыстық әрекетін тоқтатпаған.
Ол тағы бір сауда орнына кіріп, адамдарға қару кезенген. Кейін автокөлікті тартып алып, қала ішінде қозғалуын жалғастырған.
Осы уақытта полицияға бірінен соң бірі қарулы шабуыл туралы хабарламалар түсе бастаған.
Қылмыскердің ізіне түскен полиция сержанттары Полат Аянқұлов пен Жақсыбек Байсеитов оны тоқтатуға әрекеттенген. Алайда Қариев оларға оқ атып, екі қызметкерді де өлтірген.
Кейін ол Ұлттық қауіпсіздік комитетінің облыстық департаменті ғимаратына гранатаатқыштан оқ жаудырған.
Абырой болғанда, жарылыс түскен бөлмеде сол сәтте адамдар болмаған.
Ғазиз Байтасовтың соңғы ерлігі
Қарулы шабуылдың ең қайғылы сәттерінің бірі қылмыскерді ұстау операциясы кезінде болды.
Полиция капитаны Ғазиз Байтасов өз әріптестерімен бірге қарулы адамды тоқтатуға кіріскен.
Атыс кезінде Мақсат Қариев жараланғанымен, қарсылығын жалғастырған.
Күдіктінің қолында граната барын байқаған Ғазиз Байтасов айналасындағы адамдарды қорғау үшін оны тоқтатуға ұмтылған.
Тергеу материалдарында капитанның жарылыс кезінде өзгелерді қорғау мақсатында қылмыскерді құлатып, гранатаны өз денесімен жабуға тырысқаны айтылады.
Сағат 12:52-де жарылыс болып, Ғазиз Байтасов пен Мақсат Қариев қаза тапты.
Осылайша, шамамен екі сағатқа созылған қарулы шабуыл аяқталды.
Жеті адам көз жұмды
2011 жылғы 12 қарашада болған террорлық шабуыл салдарынан жеті адам қаза тапты. Олардың бесеуі құқық қорғау органдарының қызметкері, ал екеуі бейбіт тұрғын болды.
Тағы бірнеше полиция қызметкері жарақат алды.
Қылмыстың мән-жайын анықтау үшін арнайы тергеу тобы құрылып, құқық қорғау органдары ауқымды тексеру жүргізді.
Тергеу барысында Мақсат Қариевтің радикалды діни-экстремистік идеологияны ұстанғаны туралы мәліметтер жарияланды.
Ғазиз Байтасовтың ерлігі ұмытылған жоқ
Қызметтік міндетін атқару кезінде қаза тапқан полиция капитаны Ғазиз Байтасовқа қайтыс болғаннан кейін «Халық қаһарманы» атағы берілді.
Кейін Тараз қаласында оның құрметіне ескерткіш орнатылды.
2026 жылы Қазақстанда батыр полицейдің есімімен аталатын ведомстволық медаль тағайындалды.
«Халық қаһарманы Ғазиз Байтасов» медалінің алғашқы данасы оның жары Гүлжамал Тәжиеваға табысталған.
Тараздағы қайғылы оқиғаға 2026 жылғы 12 қарашада 15 жыл толады. Арада қанша уақыт өтсе де, сол күні қаза тапқан азаматтар мен олардың ерлігі ел жадында сақталып келеді.