Бүгін, 16:00
Астанада балалар алаңындағы әткеншекке кезекке тұру мәселесінен екі әйел арасында жанжал шығып, соңы төбелеске ұласқан. Оқиға кезінде әйелдердің қолында балалары болған. Жанжалдың видеосы әлеуметтік желіде тарап, көпшіліктің наразылығын тудырды, деп хабарлайды kznews.kz.
Бейнежазбада екі әйелдің бір-біріне қол жұмсап, шапалақпен ұрып жатқанын көруге болады. Ең көп талқыланған сәттердің бірі – әйелдердің бірінің төбелес кезінде баланың бетінен ұрып жіберуі. Кадрлар әлеуметтік желі қолданушылары арасында қызу пікірталасқа себеп болды.
Оқиғаға қатысты Астана қаласының полициясы түсініктеме берді. Құқық қорғау органдарының мәліметінше, жанжал балалар алаңындағы әткеншекке кезек мәселесіне байланысты туындаған.
«Оқиғаға қатысушылардың барлығы ұсталып, полиция бөліміне жеткізілді. Анықталғандай, балалар алаңындағы жанжал әткеншекке кезекке тұру мәселесінен туындаған. Соның салдарынан екі әйел бір-біріне дене жарақатын салған», – делінген полиция хабарламасында.
Қазір аталған факті бойынша қылмыстық іс қозғалып, тергеу амалдары жүргізіліп жатыр. Полиция тараптардың әрекетіне құқықтық баға беріп, оқиғаның барлық мән-жайын анықтайды.
