Бүгін, 13:30
Сарапшылар бір жылдан кейін доллардың орташа бағамы 502,6 теңге болады деп күтеді.
Қазақстанда доллар бағамы алдағы 12 айда 503 теңгеге жуықтауы мүмкін. Мұндай болжамды Қазақстан қаржыгерлер қауымдастығы (ҚҚҚ) қаржы нарығының кәсіби қатысушылары арасында жүргізген қазан айындағы сауалнама қорытындысында келтірді, деп хабарлайды kznews.kz
ҚҚҚ мәліметінше, сарапшылар бір жылдан кейін доллардың орташа бағамы 502,6 теңге болады деп күтеді. Бұл қыркүйектегі болжаммен салыстырғанда төмен. Ол кезде қаржыгерлер 12 айдан кейінгі бағамды 511,6 теңге деңгейінде болжаған.
Қысқа мерзімді болжам бойынша теңге керісінше нығаюы мүмкін. Сарапшылар қараша айының басында доллар бағамы 456,5 теңге болады деп есептейді. Қыркүйектегі сауалнамада бұл көрсеткіш 474,2 теңге болған.
ҚҚҚ сарапшылары теңгенің нығаюына бірнеше фактор әсер етіп отырғанын атап өтті. Олардың қатарында теңгелік активтердің жоғары нақты кірістілігі, Қазақстанның тәуелсіз кредиттік рейтингінің көтерілуі, Ұлттық банктің валюта нарығындағы операциялары және бейрезиденттердің мемлекеттік бағалы қағаздарға инвестициясының өсуі бар.
Сонымен қатар ұзақ мерзімді кезеңде теңгеге қысым жасайтын факторлар да бар. Қаржыгерлер мұнай бағасының өзгеруі, сыртқы сауда жағдайы, валюта нарығындағы сұраныс пен ұсыныс және бюджет пен Ұлттық қор операциялары бағамға әсер етуі мүмкін екенін ескереді.
