Бүгін, 09:00
Астанада өткен ТҮРКСОЙ халықаралық ұйымының марапаттарын табыстау рәсімінде Қазақстанның халық әртісі Димаш Құдайберген ұйымның ең жоғары наградасы – “Түркі әлемінің мәдени елшісі” атаулы орденімен марапатталды, деп хабарлайды Kznews.kz.
Бұл мәртебелі марапат әншіге түркі дүниесінің мәдениетін насихаттауға және дамытуға қосқан елеулі үлесі үшін берілді. Салтанатты рәсім барысында ТҮРКСОЙ-дың Бас хатшысы Сұлтан Раев Димаштың өнер арқылы халықтар арасын жақындастырып, мәдени елші миссиясын абыроймен атқарып жүргенін ерекше атап өтті.
Өз сөзінде Димаш Құдайберген өнер иесі үшін ең үлкен баға халықтың ықыласы екенін айтты.
“Өнер адамы үшін ең жоғары марапат – халықтың мойындауы мен қолдауы. Бұл марапатты мен елдеріміз арасындағы дипломатиялық қарым-қатынастардың нығаюын білдіретін маңызды белгі ретінде қабылдаймын. Бұл марапат жеке өзіме емес, бүкіл қазақ халқына көрсетілген құрмет пен ілтипат деп білемін”, – деді өнер иесі.
