Бүгін, 19:18
Бишімбаевтың ағасы Бахытжан Байжановқа қатысты қылмыстық іс бойынша кассациялық шағым 14 мамыр күні қаралады. Бұл туралы оның адвокаты мәлімдеді, деп хабарлайды kznews.kz.
Қорғаушы тараптың айтуынша, Байжановтың әрекеттерінде қылмыс құрамы жоқ, сондықтан оны толық ақтау қажет.
Еске сала кетейік, Бахытжан Байжанов Салтанат Нүкенованың өліміне байланысты істі жасырып қалды деген айыппен 4 жылға бас бостандығынан айырылған еді.
Тергеу нұсқасы бойынша, ол болған қылмыс туралы біле тұра құқық қорғау органдарына хабарламаған және істің мән-жайын жасыруға әрекет жасаған. Осы әрекеті үшін сот оны Қылмыстық кодекстің «қылмысты жасыру» бабы бойынша кінәлі деп таныды.
Сот процесі барысында айыптау тарапы Байжановтың қылмыс туралы хабардар болғанын дәлелдеуге тырысса, қорғаушылар оның нақты қылмыстық әрекетке қатысы жоқ екенін алға тартты. Соған қарамастан, бірінші инстанция соты оны кінәлі деп танып, 4 жылға соттады.
Қазіргі таңда қорғау тарапы бұл үкіммен келіспей, кассациялық соттан істі қайта қарап, әділ шешім шығаруды сұрап отыр.
Ал негізгі айыпталушы – бұрынғы Ұлттық экономика министрі Қуандық Бишімбаев Салтанат Нүкенованы аса қатыгездікпен өлтірді деген айыппен сотталған. Сот процесі қоғамда үлкен резонанс тудырып, ашық форматта өтті.
Сот шешімімен Қуандық Бишімбаев кінәлі деп танылып, 24 жылға бас бостандығынан айырылды. Тергеу деректеріне сәйкес, оқиға барысында ол жәбірленушіге бірнеше сағат бойы зорлық-зомбылық көрсеткен.
