Кенияның Найроби қаласында өтіп жатқан жастар арасындағы таэквондо әлем чемпионатында қазақстандық спортшы Батырхан Төлеуғали топ жарып, әлем чемпионы атанды, деп хабарлайды kznews.kz.
87 келіге дейінгі салмақ дәрежесінде сынға түскен Батырхан барлық қарсыласын айқын басымдықпен жеңіп, финалда ирандық Мохаммад Ализаденің осал тұсын тапты. Осылайша, жас таеквондошы Қазақстан құрамасының қоржынына кезекті алтын медальді салды.
Айта кетейік, бұл – ұлттық құраманың аталған жарыстағы үшінші жүлдесі. Бұған дейін Бейбарыс Қаблан әлем чемпионы атанып, Темірлан Тілеулес қола медаль жеңіп алған болатын. Жас спортшылардың осындай жетістігі Қазақстан таэквондосының әлеуеті артып келе жатқанын көрсетеді.
