Алматы қалалық қоғамдық денсаулық сақтау басқармасының бастығы Тілеухан Әбілдаев ұшақ апатынан зардап шеккен 50 адамның ауруханаға жатқызылғанын хабарлады.
- Жедел медициналық бригадалары 66 адамды ауруханаға жеткізген. Соның 50-і ауруханаға жатқызылды. №4 қалалық клиникалық ауруханаға - 19 адам, қалалық жедел жәрдем ауруханасына - 13 адам, орталық қалалық ауруханаға - үш адам жатқызылды. Жедел балаларға көмек көрсету орталығына 9 бала жеткізілген. Алматы облыстық көпсалалы ауруханаға 6 адам жатқызылды. Олардың барлығы қажетті емдеу шараларымен қамтылып отыр, - деді Тілеухан Әбілдаев.
Оның айтуынша, қажет болған жағдайда республикалық санавиация арқылы астанадан білікті дәрігерлер шақырылатынын айтты. №1 Алматы облыстық ауруханасына түскен алты адамның бесеуінің жағдайы - ауыр деп хабарлаған еді дәрігерлер.
27 желтоқсан күні таңертең Алматы маңына Bek Air әуе компаниясының Fokker-100 ұшағы құлады. Ұшақта 100 адам - 95 жолаушы және 5 экипаж мүшесі болған. Кейінірек Алматы қалалық әкімдігі ұшақта болған 93 адамның тізімін жариялады.
Әзірге толық емес ақпарат бойынша, 14 адам қаза болған.
Төтенше жағдай комитеті аты-жөні анықталған апаттан қаза болғандардың тізімін жариялады:
- Николай Астанов 1971 жылы туған;
- Хайдаров Р. 1940 жылы туған;
- Бауыржан Қалиев 1974 жылы туған;
- Базархан Карибаев 1974 жылы туған;
- Марат Мұратбаев 1961 жылы туған;
- Абай Нұрбаев 1982 жылы туған;
- А.Исина
Талғар аудандық полиция басқармасына "Гүлдала елді мекенінің маңына ұшақ құлағаны" туралы ақпарат таңертеңгі сағат 7:30-да түскен. Азаттық тілшілері апат болған аумақты полиция қоршап тастағанын хабарлаған.
Индустрия және инфрақұрылымдық даму министрлігінің баспасөз қызметінің хабарлауынша, Fokker-100 ұшағы "ұшу кезінде биікке көтеріле алмай" екі қабатты тұрғын үйге соғылған. Премьер-министрдің тапсырмасымен үкімет комиссиясы құрылған.
Azattyq
