Бүгін, 12:47
Сенат депутаты Марат Қожаев Мәжіліс депутаты Мұрат Әбеновтің қазақстандық жүргізушілер үшін алкотестерден бас тарту туралы ұсынысына қатысты пікір білдірді, деп хабарлайды kznews.kz.
Сәуір айында Мәжіліс депутаты Мұрат Әбенов кейбір өңірлерде қолданылатын алкотестерлердің сапасына күмән келтіретін жағдайлар бар екенін айтқан.
Оның сөзінше, кейбір жерлерде құрылғылар дұрыс жұмыс істемейтін немесе сенімсіз алкотестерлер пайдаланылып жүр. Мысал ретінде ол бір жағдайда құрылғының тіпті скотчпен оралғанын келтіріп, бұл оның дұрыс өлшеуіне күмән тудыратынын атап өткен.
Сондай-ақ депутаттың айтуынша, жүргізушілерге кейде қан талдауына (анализге) жіберуден бас тарту жағдайлары кездеседі. Соның салдарынан бастапқы алкотестер нәтижесі іс жүзінде «соңғы шешім» ретінде қабылданады.
Әбеновтің пікірінше, мұндай тәжірибе жүргізушілердің құқықтарын бұзуы мүмкін және тексеру рәсіміне деген сенімді төмендетеді.
Бүгін бұл мәселеге қатысты өз пікірін Сенат депутаты Марат Қожаев білдірді. Ол алкотестерлерден бас тартудың қажеті жоқ екенін айтты.
«Алкотест – бұл жол қозғалысы ережелері мен қауіпсіздік техникасының бұрыннан келе жатқан қағидасы. Егер адам ауырып тұрса немесе тест оң нәтиже көрсетсе, ол өз жағдайын түсіндіруге құқылы. Мысалы, асқазаны ауырып тұр деп немесе белгілі бір дәрілерді қабылдап жүргенін айтуына болады. Бұл жерде ешқандай мәселе жоқ. Сараптама бәрін анықтап береді», – деді сенатор.
Депутат сонымен қатар жүргізушілердің мас күйін тексерудің қазіргі қолданыстағы жүйесінің тәжірибеде қалыптасқанын да атап өтті.
«Алкотестерді алып тастаудың қажеті жоқ. Бұл жақсы ереже, оның қолданылу тәжірибесі бар. Біздің халықтың өзі бәрін жақсы түсінеді. Егер бәрін тыңдай берсек, бәрі қымыз ішіп алып мас болып қалды дегенге келеміз. Бірақ қымыз ішкені үшін ұсталған адамдар жоқ қой», – деді Кожаев.
Сенатор сонымен қатар жүргізушілер заңды сақтауы тиіс екенін, ал ережелерді бұзуға сылтау іздеудің дұрыс еместігін атап өтті.
