Газа секторындағы ауруханалар сенбі күні Израиль әуе соққылары салдарынан кемінде 29 палестиналықтың қаза тапқанын хабарлады. Бұл – 10 қазанда атысты тоқтатуға бағытталған бітім күшіне енгеннен бергі ең көп адам мерт болған күндердің бірі, деп хабарлайды Kznews.kz.
AP News мәліметінше, бір күн бұрын Израиль ХАМАС-ты бітім шарттарын қайта бұзды деп айыптағаннан кейін Газаның әр аумағында соққылар тіркелген. Ресми тұлғалар ауруханаларға жеткізілген мәйіттер туралы айта отырып, Газа қаласындағы көпқабатты тұрғын үй мен Хан-Юнистегі шатырлы лагерьге жасалған соққылардың салдары ауыр болғанын мәлімдеді. Қаза тапқандар арасында екі әйел және екі бөлек отбасының алты баласы бар.
Сонымен бірге Газа қаласындағы полиция бөліміне де әуе соққысы тиіп, кемінде 14 адам қаза тауып, бірнешеуі жараланған. Бұл туралы «Шифа» ауруханасының директоры Мохамед Әбу Селмия мәлімдеді.
Оқиға жексенбі күні Египетпен шекарадағы Рафах өткелі қайта ашылуы тиіс кезеңмен тұспа-тұс келді. Соғыс бойының басым бөлігінде анклавтағы шекаралық өткелдер жабық тұрған. Палестиналықтар Рафахты сыртта ем қабылдауға мұқтаж ондаған мың адам үшін үміт сәулесі санайды, өйткені аумақтағы медициналық инфрақұрылымның көп бөлігі қираған.
Бастапқыда шектеулі режимде іске қосылуы мүмкін бұл өткел АҚШ арағайын болған бітімнің екінші кезеңіндегі алғашқы ірі қадамдардың бірі ретінде қарастырылып отыр. Қазіргі жүріп жатқан кезеңнің күн тәртібінде шекараларды қайта ашу секілді күрделі мәселелермен қатар, секторды қарусыздандыру, қайта қалпына келтіруді қадағалайтын тетік қалыптастыру және жаңа басқару жүйесін орнату сияқты тақырыптар да бар.
Дегенмен сенбідегі шабуылдар бітім келісімі біртіндеп алға жылжығанымен, Газа секторында адам өлімі әлі де тоқтамағанын аңғартты.
«Насер» ауруханасының дерегінше, шатырлы лагерьге тиген соққыдан өрт шығып, жеті адам қаза тапқан. Олардың арасында әке, оның үш баласы және үш немересі бар. Ал «Шифа» ауруханасы Газа қаласындағы тұрғын үйге жасалған соққыдан сенбі таңында үш бала, олардың әпкесі және әжесі мерт болғанын хабарлады.
Полиция бөліміне жасалған соққыдан кемінде 14 адам – оның ішінде офицерлер, төрт полиция қызметкері әйел және бөлімде ұсталған тұтқындар – қаза тапқаны айтылды. ХАМАС басқаратын Ішкі істер министрлігі бұл соққыдан бейбіт тұрғындар да көз жұмғанын мәлімдеді.
ХАМАС сенбідегі соққыларды "қайта басталған өрескел бұзушылық" деп атап, АҚШ пен басқа да делдал елдерді Израильді соққыларды тоқтатуға мәжбүрлеуге шақырды.
Ал Израиль әскері бітім шебінің екі жағындағы нысандарға соққы жасағанын мойындай отырып, қазаннан бергі шабуылдардың бәрі келісім бұзылған жағдайларға жауап ретінде жасалғанын айтты. Әскердің хабарлауынша, сенбідегі соққылар бір күн бұрын болған "бітім шартын бұзу" әрекеттерінен кейін жасалған: армия Израиль бақылауындағы Рафах аумағында тоннельден шыққан кемінде төрт содырды өлтіргенін мәлімдеді.
Газа денсаулық сақтау министрлігінің дерегінше, 10 қазанда бітім басталғалы бері Израиль оғынан 509 палестиналық қаза тапқан. ХАМАС жетекшілік ететін үкімет құрамындағы бұл министрлік құрбандар бойынша егжей-тегжейлі есеп жүргізеді, ал оның мәліметтері БҰҰ агенттіктері мен тәуелсіз сарапшылар тарапынан, әдетте, жалпы алғанда сенімді деп бағаланады.