Ұлдана Мырзуанның отбасының адвокаты Нұрсұлтан Орынаұлы тергеу аяқталған соң кінәлілерді жауапқа тартуға бар күшін салатынын мәлімдеді, деп хабарлайды kznews.kz.
Дереккөздің мәліметінше, қазір тергеу жүріп жатыр. Сол тергеу аясында ол қылмыстық істі ҚР ҚК 278-бабы ("Сапасыз құрылыс") бойынша емес, 279-бапқа ("Архитектура, қала құрылысы және құрылыс саласындағы нормативтерді бұзу") қайта саралауды көздеп отыр.
"Тергеу жалғасып жатыр. Соңында кімнің жауапты екенін анықтаймыз: құрылыс компаниясы ма, әлде тұрғын үй басқармасы ма – бәрі тексеріледі. Үй 21 жыл бұрын пайдалануға берілген, кепілдік мерзімі біткен, бірақ мұндай ғимараттарда тұрақты тексерулер жүргізілуі керек. Қалған мәліметтерді әзірге жариялай алмаймыз", – деді Нұрсұлтан Орынаұлы.
Адвокат бұл бап бойынша алты жылға дейін бас бостандығынан айыру жазасы қарастырылғанын да атап өтті.
