Ақтөбе облысында 12 адамның өмірін қиған жантүршігерлік жол апатынан зардап шеккендердің жағдайы туралы жаңа деректер жарияланды.
Облыстық Денсаулық сақтау басқармасының мәліметінше, қазіргі уақытта барлық алты науқас Ақтөбедегі ауруханада ем қабылдап жатыр.
«Екі науқас жансақтау бөлімінде, қалған төртеуі жалпы бөлімшеге ауыстырылды. Зардап шеккендердің арасында комада жатқан 16 жастағы оқушы да бар», – деді ведомствоның баспасөз қызметі.
Бүгін жол апатынан көз жұмғандар жер қойнына тапсырылды.
Еске салайық, 23 қазанда Самара–Шымкент тасжолының Белқопа ауылы маңында болған апат салдарынан 12 адам қаза тапқан еді. Кейін апатқа кінәлі жүргізуші анықталып, бұл жағдай бойынша Үкіметтік комиссия құрылды.
