Бүгін, 10:14
Алматы қаласында бірнеше ауданның көшелеріне жаңа атаулар берілді. Тиісті шешім Алматы әкімдігі мен қалалық мәслихаттың бірлескен қаулысымен қабылданды, деп хабарлайды kznews.kz.
Құжатқа сәйкес, өзгерістер Алатау, Әуезов, Бостандық, Жетісу, Медеу, Наурызбай және Түрксіб аудандарындағы бірқатар көшеге қатысты. Қаулы 2025 жылғы 8 шілдеде өткен қалалық ономастикалық комиссияның және 10 қыркүйектегі Республикалық ономастикалық комиссияның қорытындылары, сондай-ақ тұрғындардың пікірін ескере отырып қабылданған.
Жаңа атаулардың қатарында қазақтың көрнекті тұлғаларының есімдері бар. Атап айтқанда, жазушы Әбдіжәміл Нұрпейісовтің, археолог Карл Байпақовтың, абайтанушы Қайым Мұхамедхановтың және көрнекті тілші-ғалым Рабиға Сыздықтың құрметіне көшелерге атау берілді.
Сонымен қатар Алматыдағы көшелердің біріне Вьетнамның тұңғыш президенті Хо Ши Миннің есімі берілді. Енді «Ақмаржан» және «Ғажайып» шағынаудандарының арасындағы көше Хо Ши Мин көшесі деп аталады.
Бұдан бөлек, қала картасында Жарапазан, Жезтаңдай, Парыз, Ғұлама, Маңмаңгер және Мұнара атауымен жаңа көшелер пайда болды.
