Бүгін, 13:02
Алматы облысында денесі өртенген күйде табылған полиция қызметкері Аслан Әлсеровтің өліміне қатысты жаңа деректер тарады. Алайда жарияланған ақпараттың бір бөлігі әзірге ресми түрде расталған жоқ.
Алдын ала мәліметке сәйкес, оқиға Полиция күні қарсаңында болған. Сол күні полицей жұмыстан үйіне кеш оралғаннан кейін отбасылық жанжал туындап, оның соңы төбелеске ұласуы мүмкін.
Бейресми деректе Аслан Әлсеров пен жұбайының арасында бұған дейін де тұрмыстық кикілжіңдер болғаны айтылады. Дегенмен құқық қорғау органдары бұл ақпаратқа қатысты ресми түсініктеме берген жоқ.
Тергеу нұсқаларының біріне сәйкес, жанжал кезінде үйге әйелдің 15 жастағы екі ұлы және олардың 14 жастағы танысы келген. Жасөспірімдердің бірі полицейдің басынан қатты затпен ұруы мүмкін деген болжам бар. Қазір тергеушілер соққының немен жасалғанын анықтап жатыр.
Сондай-ақ ес-түссіз жатқан ер адамның қол-аяғы киіммен байланып, денесі көрпеге немесе жаймаға оралғаны туралы мәлімет тарады. Кейін оны көлікке салып, Алматы облысының Кеген ауданына алып кеткен болуы мүмкін.
Болжам бойынша, көлік таңға жуық Көкпек – Көктал – Кеген тас жолының маңына жеткен. Күдіктілер жолдан тауға қарай шамамен жарты шақырым жүріп, сол жерде полицейдің денесін өртеген деген ақпарат бар.
Марқұмның сүйегін тауда жоғалған малын іздеп жүрген жергілікті тұрғын тауып, полицияға хабарлаған.
Қылмыстың мән-жайын анықтау мақсатында сот-медициналық сараптамалар тағайындалған. Сонымен қатар ерлі-зайыптылардың ұялы телефондары тексерілмек.
Алдын ала ақпаратта Арайлым Әлсерова, оның екі ұлы және 14 жастағы жасөспірімнің ұсталғаны айтылады. Олардың уақытша ұстау изоляторына қамалғаны және кінәсін мойындағаны туралы мәлімет те тарады. Алайда ресми органдар бұл деректерді толық растаған жоқ.
Аслан Әлсеров полиция саласында шамамен он жыл қызмет еткен. Ол бұған дейін арнайы жедел әрекет ету бөлімінде еңбек етіп, кейін Алматы қаласы Әуезов аудандық полиция басқармасының қылмыстық полиция бөлімінде аға детектив болған.
Күдіктілердің кінәсі соттың заңды күшіне енген үкімімен дәлелденгенге дейін олар кінәсіз деп есептеледі.
