Бүгін, 12:19
Әлеуметтік желілерде Алматы облысы Қарасай ауданындағы мектептердің бірінде оқушы мен мұғалім арасындағы жанжал түсірілген видео тарады. Оқиғаға қатысты өңір әкімдігі түсініктеме берді, деп хабарлайды kznews.kz.
Не болды?
Желіде тараған видеода оқушының аудан мектептерінің бірінің аумағында мұғалімге шабуыл жасағаны көрінеді.
Жарияланым авторларының айтуынша, жанжал кезекші мұғалімнің жоғары сынып оқушысына сабақ кезінде мектептен шығуға рұқсат бермеуінен басталған. Жазбада айтылғандай, төбелес салдарынан мұғалім ауыр жарақат алған.
Әкімдік не дейді?
Алматы облысы әкімдігінің хабарлауынша, оқиға 2026 жылдың қаңтар айында "Жаңа қазақ" орта мектебінде болған. Видеодағы оқушы – 11-сынып оқушысы.
"Алдын ала мәлімет бойынша, мұғалім оқушыға ескерту жасап, сабаққа, яғни оқу процесіне баруын талап еткен. Алайда оқушы бұл талапты агрессивті түрде қабылдап, педагогке қатысты құқыққа қайшы, соның ішінде бұзақылық сипаттағы әрекеттер жасаған", – деп хабарлады әкімдіктің баспасөз қызметі.
Облыс әкімдігі полицияның сотқа дейінгі тергеу жүргізіп жатқанын мәлімдеді. Қазір тергеу амалдары жүріп жатыр. Олардың нәтижесі бойынша оқушының әрекетіне құқықтық баға беріледі.
Ал Алматы облысының полициясы оқушыға қатысты қылмыстық іс қозғалғанын нақтылады. Алайда әзірге істің қай бап бойынша тергеліп жатқаны жарияланған жоқ.
