20 сәуір, 2026
АҚШ-тың Теннесси штатында 13 жастағы Саванна Коупленд таңертең ерте үйінен жасырын шығып кеткеннен кейін өлі күйінде табылды. Қыздың денесі Ноксвилл қаласының маңындағы жаяу жүргіншілер соқпағынан анықталған. Тергеу мәліметінше, оған кемінде 93 рет пышақ жарақаты салынған, олардың басым бөлігі денесінің жоғарғы бөлігіне түскен,деп хабарлайды kznews.kz Mirror басылымына сілтеме жасап.
Полиция нұсқасына сәйкес, жасөспірім 15 жастағы Малакия Харриспен және оның ағасымен кездескен. Алдын ала мәлімет бойынша, олар таңғы уақытта жолығуға келіскен, алайда бұл кездесу қайғылы аяқталған. Тергеу дерегіне қарағанда, қыз қашуға тырысқан кезде де пышақпен шабуыл жалғасқан.
Оқиғадан кейін күдіктілер қыздың денесін сол жерде қалдырып, үйлеріне кеткен. Қылмыстың нақты себебі әзірге белгісіз.
Күдікті өз сөзінде бұл әрекетін өзін-өзі қорғау мақсатында жасағанын айтқан. Алайда іс материалдарына сәйкес, кейін ол таныстарына «бәрі бітті» деген мазмұнда хабарламалар жазған, сондай-ақ куәгерлердің айтуынша, болған жағдайды мақтанышпен айтып, «алғашқы құрбаным» деген сөздер айтқан.
Қазіргі уақытта 16 жастағы Малакия Харриске бірінші дәрежелі кісі өлтіру және айғақтарды бұрмалау баптары бойынша айып тағылған. Сот оны ересек адам ретінде жауапқа тарту туралы шешім шығарды.
Қаза болған қыздың әкесі бұл істегі ең қорқыныштысы - қылмыстың нақты себебінің болмауы екенін атап өтті. Оның айтуынша, бұл жағдайды түсінуді одан әрі қиындатады. Сонымен қатар ол бұл қайғылы оқиға балалар тәрбиесіне және олардың бойында жанашырлықты қалыптастырудың маңыздылығына назар аудартатынын айтты.
