Бүгін, 13:50
Семейде 13 жастағы екі сыныптас арасындағы жанжал пышақ қолданылған төбелеске ұласып, жасөспірімдер ауыр жарақат алды, деп хабарлайды kznews.kz.
9-сыныпта бірге оқитын екі бала бұған дейін күрес үйірмесіне қатысып, жақын араласқан. Оқиға сабақтан кейін ат үйретуге кездескен кезде болған. Күтпеген жерден жанжал шығып, жасөспірімдер бір-біріне пышақ сілтеген.
Оқушылардың бірі жеңіл жарақат алып, дәрігерлер тексергеннен кейін үйіне жіберілген. Ал Омар есімді жасөспірімнің жағдайы ауыр болған. Ол денесінің 10-15 жерінен пышақ жарақатын алған. Қашып шыққан бала әпкесінің үйіне жетіп, сол жерден жедел жәрдем шақырылған.
Омарға шұғыл операция жасалып, дәрігерлер оның іш қуысына өткен жарақат салдарынан оң жақ бүйрегі мен ішкі ағзаларының зақымданғанын анықтаған. Медицина мамандары жасөспірімнің көп қан жоғалтқанын айтып отыр.
«Ота шамамен төрт сағатқа созылды. Балада іш қуысына өткен пышақ жарақаты, оң жақ бүйрек пен үлкен шарбының зақымдануы және ішкі қан кету болған. Денесі мен аяқ-қолында да бірнеше жарақат анықталды. Қазір жағдайы тұрақты, балалар хирургиясы бөліміне ауыстырылды», – деді Семей медицина университеті госпиталінің өкілі Дулат Каримов.
№52 мектеп әкімшілігінің мәліметінше, екі жасөспірім де бұған дейін тәртіп бұзбаған, мектепте немесе полицияда есепте тұрмаған. Бір сыныпта оқитын балалардың қарым-қатынасы жақсы болған.
Мектеп өкілдері оқиғаның оқу орнынан тыс жерде болғанын және аяқ астынан туындаған түсініспеушіліктен шыққанын жеткізді.
Қазір аталған факті бойынша қылмыстық іс қозғалып, сотқа дейінгі тергеу жүріп жатыр. Оқиғаның нақты себептері мен жанжалдың қалай басталғаны анықталуда. Полиция жасөспірімдер мен олардың ата-аналарына қатысты тиісті профилактикалық шаралар қабылдайтынын мәлімдеді.
