СҚО-да өз бетімен иеленіп алған жерлерді анықтау жолдары қарастырылды

ПЕТРОПАВЛ. ҚазАқпарат — Солтүстік Қазақстан облысы кәсіпкерлерінің өңірлік кеңесінде «Қалакадастр» жобасын әзірлеу мәселелері талқыланды, деп хабарлайды ҚазАқпарат тілшісі.

Мемлекеттік қызмет істері және сыбайлас жемқорлыққа қарсы іс-қимыл департаменті баспасөз қызметінің мәлімдеуінше, жоба тартылған желілердің, магистралдық желілердің иелерін, тіпті бос жатқан учаскелерді өз бетімен иеленіп алғандарды да анықтауға мүмкіндік береді.

Картаның әзірленуі 2019 жылы аяқталады.

Өңірлік кәсіпкерлер кеңесіне ҚР Мемлекеттік қызмет істері және сыбайлас жемқорлыққа қарсы іс-қимыл агенттігі төрағасының орынбасары Олжас Бектенов қатысты. Оның айтуынша, жоба барлық мемлекеттік салалардағы сыбайлас жемқорлықтарды азайтуға мүмкіндік береді.

«Отырыста кәсіпкерлер палатасы мен мемлекеттік қызмет істері департаментінің өзара ықпалдастық мәселелері қаралып, мемлекеттік сатып алулар саласындағы түйткілдер талқыланды», — дейді баспасөз қызметінің өкілдері.

Автор: Олеся Жуковень