Оқушыларға 4,5 миллион теңге сыйақы беріледі: Министр түсіндірді
Халықаралық олимпиада жеңімпаздарын ынталандыру және қолдау мақсатында «алтын» медальға 1500 АЕК көлемінде біржолғы сыйақы беріледі
Білім және ғылым министрі Асхат Аймағамбетов халықаралық олимпиада жеңімпаздарына берілетін сыйақы мөлшерін жариялады, деп хабарлайды Sputnik Қазақстан тілшісі.
«Халықаралық олимпиада жеңімпаздарын ынталандыру және қолдау мақсатында «алтын» медальға 1500 АЕК, биыл ол 4,5 миллион теңгеге жуық, «күміске» – 1000 АЕК, «қолаға» – 500 АЕК ақшалай біржолғы сыйақы тағайындау жоспарлануда», — деді Аймағамбетов үкімет отырысында.
Сондай-ақ министр халықаралық олимпиада жеңімпаздарына конкурсқа қатыспай-ақ жоғары оқу орындарына түсу үшін грант берілетінін мәлімдеді. Бұл мәселе заңнамалық түрде реттеледі.
Жеңімпаздарды дайындаған ұстаздар мен тәлімгерлерге де біржолғы қаржылай сыйақы беру жоспарланып отыр.
