Далаға шықпаңыз: Төтенше жағдайлар министрлігі қазақстандықтарға үндеу жасады

Ел аумағының басым бөлігінде жұмыс аптасының соңына дейін 40 градус ыстық болады, деп ескертті "Қазгидромет"

0
16339

Қазақстанның бірқатар өңірінде 30 маусым мен 2 шілде аралығында қатты ыстық болады. Төтенше жағдайлар министрлігі азаматтарға қажеттілік болмаған жағдайда далаға шықпауға кеңес берді, деп хабарлайды Sputnik Қазақстан.

«Қазгидрометтің» мәліметінше, Нұр-Сұлтанда 1-2 шілдеде күндіз 35-37 градус қатты ыстық болады деп болжанып отыр.

Алматыда 30 маусым күні күндіз ауа температурасы 33-35 градусты көрсетеді.

Шымкентте 30 маусым-2 шілде аралығында 40 градус, ал Түркістанда 30 маусым-2 шілде аралығында 40-42 градус аптап ыстық болады.

30 маусымда Батыс Қазақстан облысының кей жерлерінде найзағай ойнап, бұршақ жауады. Күндіз 35-39 градусқа дейін өте қатты ыстық болады. Жел оңтүстіктен, оңтүстік-батыстан соғады, кей жерлерде желдің екпіні секундына 15-20 метрге жетеді. Кей жерлерде өте жоғары өрт қаупі сақталады. Орал қаласында 30 маусымда күндіз найзағай ойнап, бұршақ жауып, 36 градус қатты ыстық болады. Жел оңтүстіктен, оңтүстік-батыстан соғады, желдің екпіні секундына18 метр болуы ықтимал.

30 маусымда күндіз Ақтөбе облысының кей жерлерінде найзағай ойнайды, онтүстік-шығыстан, шығыстан жел соғады, найзағай кезінде желдің екпіні секундына 18 метр болуы ықтимал. Өте жоғары өрт қаупі сақталады.

30 маусымда Атырау облысының кей жерлерінде найзағай ойнап, шаңды дауыл тұрады. Солтүстік-батыстан жел соғады, күндіз найзағай кезінде желдің екпіні секундына 15-20 метр болуы ықтимал.

30 маусымда күндіз Қарағанды облысының кей жерлерінде 35-38 градус қатты ыстық сақталады. Кей жерлерде өте жоғары өрт каупі сақталады. Қарағандыда күндіз 1-2 шілдеде 35-37 градус қатты ыстық болады. Жезқазғанда күндіз 30 маусымда – 2 шілдеде 36-38 градус қатты ыстық болады.

Қостанай облысында күндіз 30 маусым-1 шілде аралығында кей жерлерде 40 градус қатты ыстық, төтенше өрт қаупі сақталады.

Солтүстік Қазақстан облысының Петропавл қаласында күндіз 30 маусымда 35 градус қатты ыстық болады. 1-2 шілдеде күндіз 35-37 градус қатты ыстық, өте жоғары өрт қаупі сақталады.

Күндіз 29-30 маусымда, 1 шілдеде Алматы облысында кей жерлерінде 35-38 градус қатты ыстық болады, төтенше өрт қаупі сақталады.

30 маусымда күндіз Қызылорда облысында 40-44 градус қатты ыстық және өте жоғары өрт қаупі сақталады. Қызылорда қаласында 30 маусымда күндіз 41-43 градус қатты ыстық болады.

Жамбыл облысында 30 маусымда күндіз таулы және тау бөктеріндегі аудандарда найзағай ойнап, бұршақ жауады, солтүстік-шығыстан жел соғады, кей жерлерде желдің екпіні секундына 15-20 метрге жетуі ықтимал. 30 маусым күні күндіз облыстың басым бөлігінде 38 градусқа дейін қатты ыстық, төтенше өрт қаупі сақталады. Таразда 30 маусым күні күндіз солтүстік-шығыстан жел соғады, желдің екпіні секундына15-20 метрге жетуі ықтимал.

Ақмола облысының Көкшетау қаласында 1-2 шілдеде күндіз 35-37 градус қатты ыстық күтіледі.

Ыстықтан сақтану үшін не істеу керек

  • ағзаны сусызданудан қорғау үшін көп су, күніне кемінде 1,5-3 литр сұйықтық ішу керек;
  • аптап ыстықта кез келген физикалық белсенділіктен бас тартыңыз;
  • күндіз күн сәулесі бөлмеге түспеуі үшін терезелерді ашық реңкті перделермен жабыңыз;
  • күн өтпес үшін бас киім, ашық ауа өткізбейтін киім (мақтадан жасалған) киіңіз. Ыстық ауа райында балаларға ерекше назар аударып, сақ болыңыз.