Алматыда блок бекетті соққан ер адам полицияда 6 жыл жұмыс істеген – ІІМ

Күдікті құқық қорғау органында қызмет ету барсында өз міндетін дұрыс орындамағаны үшін 4 рет сөгіс алған

АЛМАТЫ, 26 мамыр – Sputnik. Алматыда блок бекетті соққан көлік жүргізушісі полицияда алты жыл қызмет еткен. Бұл туралы қалалық полиция департаменті хабарлады.

«Жол-көлік оқиғасын жасаған азамат бұрын полицияда алты жыл қызмет еткен. Өз міндетін дұрыс атқармағаны үшін төрт рет сөгіс алған. Бұл оның ішкі істер органдарынан қызметінен босатылуына себеп болды. Соның өзінен бұл сабақ алмады. Заңды бұзып және зардабының ауыр болатынын біле тұра, көлікке мас күйінде отырып, қылмыс жасады», – деді Алматы қаласы полиция департаментінің бастығы Қанат Таймерденов.

Екі және одан да көп адам өлтіру фактісі бойынша 1992 жылы туған ер адамға қатысты қылмыстық кодекстің 99-бабының 2-бөлігі бойынша сотқа дейінгі тергеу басталды (бұл бап бойынша 15 жылдан 20 жылға дейінгі мерзімге бас бостандығынан айыру немесе өмір бойына бас бостандығынан айыру жазасы тағайындалады).

Қазір күдікті қамауға алынды.

Алматы блок бекетіндегі оқиға

25 мамырда Көксай шағын ауданындағы Жаңа ғасыр мен Қожабеков көшелерінің қиылысындағы №4 блок бекетте BMW автокөлігінің жүргізушісі алдымен блок бекет қоршауына, содан кейін екі полицей отырған патрульдік көлікке соқтығысқан.

 42 жастағы полицей Жарас Жанғазиев оқиға орнында қаза болды. Ал 26 жастағы екінші полицей Дастан Әбдіқанов ауруханада есін жимастан көз жұмды.

Ережеге бағынбаған азаматтың ішімдік ішкені расталды. Ол Алатау ауданының тұрғыны болып шықты.

Оқи салдарынан зардап шеккен тағы бір полиция қызметкері ауыр халде жатыр.

Оқи отырыңыз: Алматыда екі полицейдің өмірін қиған апаттың куәгері: жедел жәрдем кеш келді

Айта кетейік, осы кезге дейін әлеуметтік желілерде блок бекетті соққан жүргізуші бұрынғы полиция қызметкері деген ақпарат тарады. Ал полиция департаменті бұл ақпаратты жоққа шығарған болатын.