Айбек Нұғымаров сарбаздармен кездесті » Vesti.kz

0
102
«Әлем Барысы» турнирінің екі дүркін жеңімпазы Айбек Нұғымаров «Шығыс» өңірлік қолбасшылығының әскери қызметшілерімен кездесті, – деп хабарлайды Vesti.kz.

Қазақстан Республикасының Тәуелсіздік күні қарсаңында, сондай-ақ, әскери қызметтің имиджі мен беделін көтеру және салауатты өмір салтын насихаттау мақсатында «Шығыс» өңірлік қолбасшылығының әскери қызметкерлері «Әлем Барысы» турнирінің екі дүркін жеңімпазы Айбек Нұғымаровпен кездесті.

Салтанатты жиналысқа Семей гарнизонының әскери бөлімдерінің әскери қызметшілері, «Жас Қыран» әскери-патриоттық клубының тәрбиеленушілері, жауынгерлік және дене шынықтыру даярлығының үздіктері қатысты.
Кездесу барысында «Әлем Барысы» өзінің алдына қойған мақсатына қалай қол жеткізгенін, қандай қиындықтар мен кедергілерге тап болғанын және ол үшін Отанының патриоты болу нені білдіретінін айтып өтті.

«Еліміздің кешегі батырлары мен қаһармандары, бүгін ол сіздер, мен сіздерге сенемін.  Біздің Отанымыздың намысын спорт жарыстарында қорғаймыз, және жарыс қорытындысы бойынша Туымыздың жоғары көтерілуі және біздің Әнұранымыз ойнағанда біз мақтан тұтамыз, бұл біздің ортақ жеңісіміз. Сіздер бізді және отбасымызды қорғайсыздар және Отан алдында берген анттарыңызды әрқашан орындауға дайынсыздар. Мені сіздердің ерең еңбектеріңіз әрдайым шабыттандырады», – деді «Әлем барысы» Айбек Нұғымаров өз сөзінде.

Сонымен бірге, «Әлем Барысы» әрдайым спортпен шұғылдануға, салауатты өмір салтын ұстануға және өз Отанын жан-тәнімен сүйіп, әскери міндетін орындауға кеңес береді.

«Бүгінгі кездесу біздің әскери қызметшілерімізді, әсіресе, мерзімді әскери қызметін өтеп жатқан әскери қызметшілерді тамсандырды. Қазақша күрестен қазіргі әлем чемпионы Айбек Нұғымаровпен кездесетінімізді және ол біз сияқты қарапайым жігіт болып шығатынын ешқайсымыз да ойламаған едік. Біз оның аузынан, жеңіске жету жолын естігенімізге өте қатты қуандық. Осы кездесуден кейін біздің әскери қызметшілеріміз жауынгерлік дайындықпен айналысуды бұрынғыдан жоғары ынта-жігермен жалғастырады деп үміттенемін», – деді «Шығыс» өңірлік қолбасшылығының баспасөз қызметінің бастығы аға лейтенант Исламбек Қалдыбеков.

Кездесу соңында «Әлем барысы» штаб бастығы – «Шығыс» өңірлік қолбасшылығының әскерлер қолбасшысының бірінші орынбасары полковник Қуанышбек Уштаевпен бірге 2018 оқу жылының қорытындысы  бойынша жақсы жағынан көріне білген әскери спортшыларды және өңірлік қолбасшылықтың қоян-қолтық ұрысынан үздік спортшы кіші сержант Арахт Баяхметовты марапаттады.

Дереккөз: http://kaz.vesti.kz/