Үкімет басшысы Бақытжан Сағынтаевтың қатысуымен Президент жанындағы Шетелдік инвесторлар кеңесінің аралық отырысы өтті.
Жиын барысында инвестициялық саясатты іске асыру, еңбек заңнамасын, адами капиталды дамыту, шетелдік жұмыс күшін тарту, сондай-ақ энергетика, экология мен мұнай-газ салаларын өркендету мәселелері қаралды. Бұдан бөлек, кеңестің 32-пленарлық отырысына дайындық барысы да талқыланды.
Инвестициялар және даму министрі Ж.Қасымбек, Еңбек және халықты әлеуметтік қорғау министрі М.Әбілқасымова, Білім және ғылым вице-министрі Б.Асылова, «Қазақстанның шетелдік инвесторлар кеңесі» қауымдастығының басқарма төрағасы А.Прейманис, кеңестің шетелдік тараптан тең төрағалары Е.Досымбеков, Ш.Гомез атқарылған жұмыстар туралы баяндады. Отырысқа қатысушылар шетелдік инвесторлармен бірлесіп жүзеге асырылатын жұмыс бағыттарын анықтады. Ұлттық экономика министрі Тимур Сүлейменов, Қаржы министрі Алихан Смайылов, Энергетика министрі Қанат Бозымбаев келешегі бар жобаларға түсініктеме берді.
Премьер-министр «Болашақ еңбек нарығы: жаңа мүмкіндіктер» атты форумға да қатысты. Бұл – төртінші өнеркәсіптік революция жағдайларында, әлемдік еңбек нарығының сан құбылуы аясында Қазақстанда жұмыспен қамту және әлеуметтік саланы дамыту перспективаларын талқылауға арналған алғашқы тақырыптық алаң.
Жиынның пленарлық сессиясы кезінде сөз сөйлеген Бақытжан Сағынтаев еңбек нарығында орын алып жатқан өзгерістер және соған байланысты сын-тегеуріндер мен жаңа мүмкіндіктер қазір ең өзекті мәселелердің бірі екеніне назар аудартты. Ол сарапшыларға сілтеме жасай отырып, «2025 жылға дейін шамамен жұмыс орындарының 4% немесе 140 млн-ы жойылып кетуі мүмкіндігін», «ал 80-90% немесе шамамен 3 млрд жұмыс орны күрделене түсетінін» айтты.
«Бұрынғы кәсіптердің жойылып, жаңа кәсіптердің күрделенуі үкіметтердің күн тәртібіне автоматтандыру нәтижесінде жойылған жұмыс орындарының орнын толтыру, өз елдеріндегі еңбек ресурстарының жаңа дағдыларды игеру икемін қамтамасыз ету мәселелерін қойып отыр. Дегенмен технологиялар мен инновациялар жаңа кәсіптер мен салалардың пайда болуына, яғни жаңа жұмыс орындарының ашылуына сеп болады. Болжам бойынша жаһандық еңбек нарығындағы жұмыс орындарының шамамен 10% немесе 350 млн-ы жаңа кәсіп түрінде ұсынылады. Олар дәстүрлі салалар мен инновациялар тоғысында пайда болмақ», – деп түйді Үкімет басшысы.