Отандық эстрада жұлдызы Жазира Байырбекова жаңа жылды шығармашылық жаңалықпен бастады. Әнші мерекенің алғашқы күндерінде жаңа бейнебаянның түсіріліміне кіріскенін әлеуметтік желідегі парақшасында хабарлады, деп хабарлайды kznews.kz.
Өнер иесінің айтуынша, клип «Бауырсағы балдай қыз» әніне арналып түсіріліп жатыр және бұл жұмыс оның болашақ келініне арналған ерекше сый болмақ. Бейнебаянға келіннің өзі де қатысып, туындыға шынайы эмоция мен отбасылық жылулық бермек.
«Жаңа жылдың жаңа күнінде болашақ келініме арнап түсірілген ерекше бейнебаян. Бұл ән – келінге деген аналық мейірімнің, ақ тілектің, отбасы ішіндегі береке мен сыйластықтың көрінісі. Осындай қуанышты сәттер әр шаңырақта көбейе берсін», – деді Жазира Байырбекова.
Әнші бұл бейнебаян арқылы қазақы отбасылық құндылықтарды, келін мен ененің арасындағы ізгі қарым-қатынасты дәріптеуді мақсат еткенін де атап өтті. Желі қолданушылары әншінің бастамасын жылы қабылдап, алдағы бейнебаянға сәттілік тілеп жатыр.
