Бүгін, 08:24
Желіде Мәжілістің бұрынғы депутаты Бақытжан Базарбектің Жамбыл облысында жол-көлік оқиғасына қатысы бары туралы ақпарат тарады. Полиция оқиғаның болғанын растағанымен, көлік жүргізген адамның экс-депутат екенін әзірге ресми түрде жариялаған жоқ, деп хабарлайды kznews.kz.
Жол апаты Тұрар Рысқұлов ауданы аумағында, «Батыс Еуропа – Батыс Қытай» халықаралық автожолында болған. Алдын ала мәлімет бойынша, Toyota маркалы көлік жолдың жүріс бөлігінде тұрған ер адамды қағып кеткен. Зардап шеккен азамат ауыр жарақатпен аудандық орталық аурухананың жансақтау бөліміне жеткізілген.
Полиция мәліметінде көлік жүргізушісі тек «Б. есімді азамат» деп көрсетілген. Осыған байланысты әлеуметтік желілерде оның Бақытжан Базарбек болуы мүмкін деген ақпарат тараған. Алайда құқық қорғау органдары бұл ақпаратты әзірге тікелей растамаған.
Бірқатар ақпарат құралдарының жазуынша, жол апатына дейін осы аумақта басқа көлік сиырмен соқтығысқан. Кейін бірнеше адам жолда қалған малды қауіпсіз жерге алып шығуға әрекет жасаған кезде олардың бірін Toyota көлігі қағып кеткен. Бұл мәліметтің нақты мән-жайы тергеу барысында анықталуы тиіс.
Жамбыл облысының полиция департаменті аталған жол апатына байланысты қылмыстық іс қозғалғанынхабарлады. Қазір оқиғаның барлық мән-жайын анықтауға бағытталған тергеу амалдары жүргізіліп жатыр.
Осылайша, қазіргі таңда Бақытжан Базарбектің жол апатына қатысы бары туралы ақпарат ресми түрде толық расталған жоқ. Нақты жағдай тергеу нәтижесінде белгілі болады.
