Бүгін, 13:54
World Boxing Organization қазақстандық орта салмақтағы әлем чемпионы Жәнібек Әлімханұлына қатысты тәртіптік шешім қабылдады, деп хабарлайды kznews.kz.
Ұйым мәліметінше, спортшының допинг сынамасынан тыйым салынған мельдоний заты анықталған. Осыған байланысты боксшы бір жыл мерзімге жарыстардан шеттетілді. Сонымен қатар, оның чемпиондық белбеулері өзінде қалдырылғаны айтылды.
Шеттету кезеңінде Әлімханұлына кәсіби және көрме жекпе-жектеріне қатысуға тыйым салынады. Орта салмақтағы бәсекелестікті сақтау мақсатында WBO уақытша чемпиондық атақ үшін жекпе-жек өткізуге рұқсат берді. Рейтингтің бірінші нөмірі Дензел Бентли екінші орында тұрған Энди Сааведрамен кездеседі.
Ұйымның мәлімдеуінше, шеттету мерзімі аяқталғаннан кейін Жәнібек Әлімханұлы уақытша чемпионмен міндетті түрде айқас өткізуі тиіс. Бұл талап орындалмаған жағдайда регламентке сәйкес қосымша шаралар қарастырылуы мүмкін. Аталған шешімге дейін аралық жекпе-жек өткізуге рұқсат берілмейді.
WBO президенті Густаво Оливьери Чемпиондық жекпе-жектер жөніндегі комитет шешімді бірауыздан қабылдағанын мәлімдеді. Жаза мерзімі 2025 жылғы 2 желтоқсаннан бастап есептеледі. Ресми құжат толық нұсқада кейінірек жарияланатыны хабарланды.
