19 шілде, 2026
«Жаңа адамдар» қозғалысы елордадағы Триатлон саябағында жануарларға жауапкершілікпен қарау мәдениетін дәріптеуге бағытталған «Жануарларға мейірімді бол» акциясын өткізді. Іс-шараға үй жануарларының иелері, сала мамандары және жануарларды күтіп-бағу мәселесіне қызығушылық танытқан қала тұрғындары қатысты, деп хабарлайды kznews.kz.
Акция кезінде кинологтар мен ветеринария мамандары тұрғындарға кеңес беріп, үй жануарларын дұрыс күту және олармен қауіпсіз қарым-қатынас орнату жолдарын түсіндірді. Сондай-ақ бірнеше күшік жаңа иелерін тапты. Оларға жануарлардың денсаулығын бақылау және жауапкершілікпен күтіп-бағу жөнінде қажетті ақпарат берілді.
Іс-шараға Пиксель есімді ерекше ит те қатысты. Ол Қазақстанда остеоинтеграция әдісімен протез орнату операциясы сәтті жасалған алғашқы ит болды. Мамандар мен жанашыр жандардың көмегінің арқасында Пиксель оңалту кезеңінен өтіп, қалыпты өміріне қайта оралды.
Бұл тақырып 20 шілдеден бастап күшіне енетін заңнамалық өзгерістер аясында ерекше маңызға ие. Жаңартылған талаптар үй жануарлары иелерінің жауапкершілігін күшейтіп, жануарларды ұстау мен айналадағы адамдардың қауіпсіздігін қамтамасыз етуге қатысты жаңа міндеттерді белгілейді.
«Жаңа адамдар» көшбасшысы Владимир Изюмниковтың айтуынша, заң талаптарының тиімді орындалуы қоғамның белсенді қатысуына байланысты. Ол жануарларға жауапкершілікпен қарау тек заң талабы емес, қоғам мәдениетінің ажырамас бөлігі болуы керектігін атап өтті.
