Бүгін, 18:27
Алматыдағы колледждің диплом табыстау рәсімінде болған ерекше сәт әлеуметтік желіде қызу талқыға түсті, деп хабарлайды kznews.kz.
Алматы Бизнес және коммуникациялар колледжінің бітіру кешінде түлектердің бірі сахнада дипломын жыртып жатқандай әрекет жасап, жиналғандарды таңғалдырған. Оқиғаның видеосы әлеуметтік желілерде кең тарап, көпшіліктің түрлі пікірін тудырды.
Алғашында көпшілік түлек ресми құжатын көпшілік алдында жыртып жіберді деп ойлаған. Алайда кейін бұл шынайы диплом емес, арнайы әзірленген екінші мұқаба екені анықталды. Яғни студенттің негізгі дипломына ешқандай зиян келмеген.
Оқиғадан кейін әлеуметтік желі қолданушыларының пікірі екіге бөлінді. Бірі мұндай қойылымды әзіл мен шығармашылықтың көрінісі деп бағалап, түлектің ерекше идеясын қолдады. Ал енді біреулері диплом табыстау рәсімі ұстаздардың еңбегі мен студенттің бірнеше жылдық оқуын қорытындылайтын маңызды сәт екенін айтып, мұндай әрекетті орынсыз деп сынға алды.
Сонымен қатар, кейбір қолданушылар бұл жағдайды тым әсірелеудің қажеті жоқ екенін жеткізіп, ресми құжатқа ешқандай залал келмегендіктен, болған оқиғаны әзіл ретінде қабылдауға шақырды.
Осылайша, бірнеше секундтық қойылым әлеуметтік желіде қызу пікірталас туғызып, көпшілікті екі түрлі көзқарасқа бөлді.
