Сот әлеуметтік желілер арқылы «ұлын емдеуге» деп 1,5 млрд теңге жинаған Даулет пен Толқын Тотақановтарға қатысты үкім шығарды. Ерлі-зайыпты аса ірі көлемде алаяқтық жасағаны және қылмыстық жолмен алынған қаражатты заңдастырғаны үшін кінәлі деп танылды, деп хабарлайды kznews.kz.
Сот анықтағандай, 2020–2024 жылдар аралығында ерлі-зайыптылар Instagram желісіндегі @altair_tota парақшасы арқылы өз баласының ауыр дертке шалдыққаны және оған шұғыл ем қажет екені туралы жалған мәлімет таратып, азаматтардан қайырымдылық қаражатын жинаған. Қаражат тарту мақсатында олар жазылушылардың эмоциясына әсер ететін үндеулер жасап, жиналған ақшаның нақты мақсатта жұмсалатыны жөнінде қоғамды жаңылыстырған.
Соттың мәліметінше, жиналған қаражаттың едәуір бөлігі — 1,3 млрд теңгеден астамы сотталғандардың жеке қажеттіліктеріне жұмсалған. Атап айтқанда, ақша қымбат бутиктерден сауда жасауға, букмекерлік ставкаларға және өзге де жеке шығындарға кеткен.
Сот шешімімен Даулет Тотақанов пен Толқын Тотақанова әрқайсысы 7 жылға бас бостандығынан айырылып, мүліктері тәркіленді. Үкім жарияланғаннан кейін Даулет Тотақанов сот залында бірден қамауға алынды. Ал Қазақстан Республикасы Қылмыстық кодексінің 74-бабының 1-бөлігіне сәйкес, кәмелетке толмаған баласының болуына байланысты Толқын Тотақанованың жазасын өтеуі 2 жыл мерзімге кейінге қалдырылды.
Сонымен қатар сот оларды 10 жыл мерзімге қайырымдылық қызметпен, соның ішінде қаражат жинаумен байланысты кез келген қызметпен айналысу құқығынан айырды.
Аталған іс қоғамда үлкен резонанс тудырып, әлеуметтік желілер арқылы жүргізілетін қайырымдылық жинауларға қатысты бақылауды күшейту және ашықтықты қамтамасыз ету қажеттігін көрсетті. Сот өкілдері азаматтарды қайырымдылық аударымдарын жасамас бұрын ақпараттың шынайылығын мұқият тексеруге шақырды.
