Бүгін, 15:54
Үйлену тойында ауыр жарақат алған күйеу жігіт бірнеше күн бойы өмір үшін күрескенімен, дәрігерлер оны аман алып қала алмады, деп хабарлайды kznews.kz, tvknews.ru-ға сілтеме жасап.
Марқұмның жұбайы Юлия Юхновичтің айтуынша, қайғылы оқиға тойдың соңына таман болған. Сол сәтте мейрамхана аумағында қатар өтіп жатқан мерейтой қонақтары мен той қонақтарының арасында жанжал шыққан.
Әйелдің сөзінше, ол заттарын жинауға кеткен кезде күйеуі Семен Приходько достарын алып келуге шыққан. Сол сәтте оның бала күнгі досы Юрий жиналған жұрттан «Менің әйеліме кім тиісіп жүр?» деп сұраған. Осы кезде көпшілік арасынан бір ер адам шығып, Юрийдің бетінен ұрып жіберген.
Семен досын қорғау үшін араша түскен. Артынша төбелес күшейіп, белгісіз ер адам қалтасынан пышақ шығарып, Семеннің кеуде тұсына бір рет сұққан.
Юлияның айтуынша, жарақат сырт көзге аса ауыр болып көрінбеген. Алайда пышақ жүрек пен өкпеге тиіп, күйеуі көп қан жоғалтқан.
Зардап шеккен азамат алдымен жергілікті ауруханаға жеткізіліп, кейін санитарлық авиация арқылы басқа қаладағы медициналық мекемеге ауыстырылған. Дәрігерлер шамамен он күн бойы оның өмірі үшін күрескенімен, 19 шілдеде Семен көз жұмған.
Марқұмның жұбайы осы уақытқа дейін бұл жағдай туралы жария түрде айтпағанын жеткізді. Оның сөзінше, отбасы соңғы сәтке дейін оның аман қалатынына үміттенген.
Күдікті 12 шілдеде полицияға өз еркімен келген. Сот оны тергеу изоляторына қамаған, ал қылмыстық істі Тергеу комитеті өз өндірісіне алған.
Алайда кейінірек Юлия күдіктінің әскери киімдегі суреттерін көргенін айтады. Оның айтуынша, ер адам келісімшартқа отырып, арнайы әскери операция аймағына аттануға дайындалған.
«Маған оның әскери киімдегі суреттерін жіберді. Кейін оның Красноярскіде жүргенін және арнайы әскери операция аймағына жіберілетінін естідім. Біреудің өмірін қиған адам осылайша жазадан құтыла ма деген сұрақ мазалайды. Бұл істің жауапсыз қалмағанын қалаймын», - дейді марқұмның жұбайы.
27 шілдеде әйел Тергеу комитетіне барып, күдіктінің расымен әскери қызметке келісімшартқа отырғанын білген. Оның айтуынша, қазіргі заңнамаға сәйкес, кейбір жағдайларда адам негізгі сот процесі басталғанға дейін келісімшартқа отырып, әскери қызметке кете алады.
Сондай-ақ Юлия тергеу материалдарында мейрамханадағы бейнебақылау камераларының жазбалары бар екенін айтты. Алайда ол бұл жазбалармен тек бір жарым айдан кейін ғана таныса алатынын жеткізді.
Айта кетейік, бұл қайғылы оқиға Ресейдің Краснояр өлкесіне қарасты Ачинск қаласында болған.
