Бүгін, 14:30
Әскери полиция Өскемен гарнизонындағы әскери бөлімдердің бірінен қызмет орнын өз еркімен тастап кеткен мерзімді әскери қызметшіні ұстады, деп хабарлайды kznews.kz Қазақстан Қарулы күштері Әскери полициясы бас басқармасына сілтеме жасап.
Әскери қызметші облыс орталығынан шамамен 20 шақырым жерден табылған. Ұсталған сарбаз – қатардағы Мархан А.Е. Ол әскери полиция бөліміне жеткізілді. Оның өмірі мен денсаулығына ешқандай қауіп жоқ.
Алдын ала мәлімет бойынша, сарбаздың әскери бөлімнен кетуіне үйін сағынуы себеп болған.
«Тексеру барысында әскери қызметші командирлер немесе бірге қызмет атқарып жүрген сарбаздар тарапынан әлімжеттік пен қызметтік өкілеттікті асыра пайдалану фактілері болмағанын мәлімдеді», – деп хабарлады Қазақстан Қарулы күштері Әскери полициясы бас басқармасы.
Аталған дерек бойынша тексеру жүргізіліп жатыр. Оқиғаның себептері мен барлық мән-жайы анықталуда.
