Ғылым және жоғары білім министрлігінің Жоғары және жоғары оқу орнынан кейінгі білім комитеті ҰБТ жүйесін жетілдіруге қатысты түсініктеме берді, деп хабарлайды kznews.kz.
Ведомство мәліметінше, Қазақстандағы ҰБТ-ны халықаралық деңгейдегі сапалы тестілеу жүйесіне айналдыру мақсатында арнайы жұмыс тобы құрылған. Оның аясында әлемге әйгілі Educational Testing Service (ETS) компаниясында оқытуға арналған әзірлеушілер мен сарапшылар тізімі жасалып, ҰБТ-ны кезең-кезеңімен дамытуға арналған бес жылдық жоспар әзірленбек. Сонымен қатар ETS-пен бірлесіп тест форматын жетілдірудің әдіснамасы дайындалады.
«Қазақстандық ҰБТ-ны үздік әдіснамасы мен сапасы бар халықаралық тестілеу жүйесіне айналдыру үшін арнайы жұмыс тобы құрылды», – делінген министрліктің Kazinform агенттігіне берген жауабында.
Сонымен бірге министрлік 2026 жылы ҰБТ форматына ешқандай өзгеріс енгізу жоспарланбағанын нақтылады.
«Барлық өзгеріс ғылыми тұрғыда зерделеніп, отандық және шетелдік тәжірибелі сарапшылардың қатысуымен жан-жақты талқыланады. Білімді бағалау жүйесіндегі жаңашылдықтар мен олардың маңызы қоғамға кезең-кезеңімен түсіндірілетін болады», – деп атап өтті ведомство.
