Бүгін, 10:13
Түркістан облысының Бәйдібек ауданында жеті адамның өмірін қиған жол апатына қатысты қылмыстық іс қозғалды, деп хабарлайды kznews.kz.
Қайғылы оқиға Шаян–Екпінді автожолында түнгі уақытта болған. Алдын ала ақпарат бойынша, Toyota Camry мен Volkswagen Passat жеңіл автокөліктері бетпе-бет соқтығысқан. Апат салдарынан жеті адам оқиға орнында қаза тапқан.
Облыстық полиция департаментінің мәліметінше, қазіргі уақытта жол-көлік оқиғасының себептері мен барлық мән-жайын анықтау үшін тергеу амалдары жүргізіліп жатыр. Тергеу аяқталғаннан кейін заң талаптарына сәйкес процессуалдық шешім қабылданады.
Тәртіп сақшылары жүргізушілерге жол қозғалысы ережелерін қатаң сақтауды, белгіленген жылдамдықты асырмауды және жол мен ауа райы жағдайына сай көлік басқаруды ескертті. Сондай-ақ жолда аса сақ болып, қауіпсіздік талаптарын назардан тыс қалдырмауға шақырды.
