Бүгін, 21:25
Қазақстан Республикасының Сыртқы істер министрлігі Ыстанбұл қаласында қазақстандық азаматтың қаза табуына қатысты пікір білдірді, деп хабарлайды kznews.kz.
Ведомство мәліметінше, оқиға биыл 31 наурыз күні Түркияның Ыстанбұл қаласының Фатих ауданында болған.
«Қазақстанның Сыртқы істер министрлігі аталған оқиғадан хабардар. Қазіргі уақытта Түркия Республикасының құзырлы органдары тиісті тергеу амалдарын жүргізіп жатыр. Қазақстан Республикасының Ыстанбұлдағы Бас консулдығы марқұмның туыстарына қажетті көмек көрсетуде. Мәселе бақылауда», – делінген ресми хабарламада.
Белгілі болғандай, қылмыс жексенбі күні шамамен сағат 16:30 шамасында болған. Белгісіз адам жеке логистикалық компанияда курьер болып жұмыс істеген Қазақстан азаматы Ариф Исмаиловқа оқ атқан.
Ауыр жарақат алған азамат ауруханада көз жұмған.
Ыстанбұл полициясы күдіктілердің көлігін анықтап, кейін дрондардың көмегімен олардың өзін де ұстаған. Алдын ала мәлімет бойынша, күдіктілер – Грузия азаматтары, олар шекарадан қашып өтпек болған.
Қылмыстың себептері әзірге белгісіз.
