Бүгін, 13:25
Түркияда өндірістік тәжірибеден өтіп жүрген қазақстандық бойжеткеннің жол-көлік оқиғасынан қаза тапқаны белгілі болды, деп хабарлайды kznews.kz.
Марқұмның жақындарының айтуынша, қайғылы оқиға 15 маусым күні болған. Алдын ала мәліметке сәйкес, қазақстандық студент Анталиядағы қонақүйлердің бірінде аниматор болып жұмыс істеп жүрген. Сол түні оның іші қатты ауырып, танысы медициналық көмек көрсету үшін ауруханаға алып бара жатқан кезде жол апатына ұшырап, бойжеткен көз жұмған.
Қазақстан Республикасы Сыртқы істер министрлігі Анталиядағы Бас консулдық марқұмның туыстарына қажетті консулдық-құқықтық көмек көрсеткенін мәлімдеді. Атап айтқанда, құжаттарды рәсімдеу және мәйітті Қазақстанға жеткізу жұмыстарына қолдау көрсетілген.
Сондай-ақ ведомство қазақстандық азаматшаның қаза болуына қатысты істің мән-жайы Бас консулдықтың тұрақты бақылауында екенін хабарлады. Қазіргі уақытта Түркияның құзырлы органдарымен бірлесіп барлық жағдайды анықтау бағытында жұмыс жалғасып жатыр.
