АҚШ президенті Дональд Трамп Украина президенті Владимир Зеленскийге телефон соқты. Axios басылымына олардың әңгімесінің мазмұны белгілі болған. Жарты сағатқа созылған телефон арқылы сөйлесу екі президенттің қаңтар айының соңында Давоста өткен кездесуінен кейінгі алғашқы байланысы болды, деп хабарлайды kznews.kz.
Украиналық шенеунік пен әңгіменің мазмұнынан хабардар тағы екі дереккөздің айтуынша, президент Трамп Владимир Зеленскийге Ресеймен арадағы соғысты мүмкіндігінше тезірек тоқтатқысы келетінін жеткізген. Ол бейбіт келісімге жазға дейін қол жеткізуді көздеп отыр.
Алайда Украина мен Ресей арасында, әсіресе шығыс өңірлердегі аумақтық бақылау мәселесі бойынша, әлі де елеулі келіспеушіліктер бар.
Бұл телефон қоңырауы Трамптың арнайы өкілдері Джаред Кушнер мен Стив Уиткоффтың Женевада Зеленскийдің келіссөз тобы өкілдерімен кездесуі қарсаңында өтті. Кушнер мен Уиткофф сәрсенбі күні Зеленскиймен өткен телефон сөйлесуіне де қатысқан.
Дереккөздің айтуынша, бейсенбі күні Женеваға ресейлік келіссөз жүргізуші Кирилл Дмитриев келіп, америкалық өкілдермен жеке кездесу өткізуі мүмкін.
Үш дереккөздің мәліметінше, Трамп пен Зеленский арасындағы әңгіме өте жылы әрі позитивті жағдайда өткен. Украиналық шенеунік пен тағы бір ақпарат көзі Зеленский Трампқа көрсеткен қолдауы үшін алғыс айтып, соғысты тоқтатуға тек Трамптың ғана ықпал ете алатынын жеткізгенін мәлімдеді.
"Содан кейін Зеленский соғыс биыл аяқталады деп үміттенетінін айтты. Ал Трамп соғыс тым ұзаққа созылғанын айтып, оны бір айдың ішінде аяқтағысы келетінін білдірді", – деді дереккөздердің бірі.