Қайғылы оқиға бойынша Мадина Халимоваға «Адам өлтіру» бабы бойынша қылмыстық іс қозғалды. Егер кінәсі дәлелденсе, ол 15 жылдан 25 жылға дейін бас бостандығынан айырылуы мүмкін.
Әйелдің туыстары оның психикалық денсаулығына күмән келтірсе, қорғаушысы Бехруз Алиев бұл пікірмен келіспейді. Оның айтуынша, Мадина күйеуін қатты қызғанғаннан кейін осындай ауыр қадамға барған.
— Сол күні күйеуім жас жұбайларды көлігімен қалаға апарып тастады. Кешке көліктен гүл мен костюмді көріп, қатты қызғанып, ішім ашумен кетті. Түнде телефонына басқа әйелден хабарлама келгенде, өз-өзімді ұстай алмай қалдым, — деп түсініктеме берген Халимова тергеу барысында.
Ол бұл әрекетіне күйеуін кінәламайтынын айтып, алдымен үш баласын өзенге лақтырып, соңғы баласын құшақтап бірге секіргенін баяндаған. Алайда су ішінде әлсіреп, аман қалу үшін сәбиін босатып жіберуге мәжбүр болғанын мойындады. Түнді орманда өткізгенін де жасырмаған.
Қайтыс болған балалардың — 3 жастағы Зейнаб, 2 айлық Мұхаммад және 2 жастағы Есаминнің — мүрделері табылып, жер қойнына тапсырылды. 5 жастағы үлкен қызды іздеу жұмыстары Сурхоб және Пяндж өзендерінде жалғасып жатыр.
