Президент Қасым-Жомарт Тоқаев қазақстандықтардың жергілікті инфрақұрылымға қатысты шағымдарына әкімдіктердің реакциясы туралы пікір білдірді, деп хабарлайды kznews.kz.
Астанада өткен ауыл әкімдерінің диалог алаңында Мемлекет басшысы бүгінде азаматтардың өтініш-шағымдарын қарау бойынша ауқымды жұмыс жүргізіліп жатқанын атап өтті. Оның айтуынша, қазіргі таңда ауыл әкімі бірыңғай ақпараттық жүйе арқылы тұрғындардың мәселелерін оңай бақылай алады. Әрбір азаматтың өтінішіне нақты, түсінікті жауап берілуі тиіс.
«Әдетте, өтініштердің басым бөлігі жергілікті инфрақұрылымға – жолдарға, аулаларға, балалар алаңдарына қатысты. Бұл – жергілікті жерде шешілуі қажет негізгі мәселелер. Алайда әкімдіктер мұндай өтініштерді жиі елемейді, ал жауап ала алмаған тұрғындар орталыққа, тіпті Президент Әкімшілігіне шағымдануға мәжбүр болады», – деді Президент.
Президент бұл көрсеткіштің маңыздылығына тоқталып, азаматтардың жергілікті билікке деген сенім деңгейін дәл осы шағымдар саны арқылы бағалауға болатынын атап өтті.
