18 наурыз, 2020
Қасым-Жомарт Тоқаев Өзбекстан басшысы Шавкат Мирзиёевпен телефон арқылы сөйлесіп, коронавирус пандемиясының таралу жағдайын талқылады, деп хабарлайды Stan.kz ақпарат агенттігі.
Бұл туралы Ақорда сайтында жарияланды.
Екі ел президенттері осы індетке қарсы күреске байланысты қабылданған шаралар туралы ақпаратпен алмасты.
Шавкат Мирзиёев қазақстандық әріптесінің дер кезінде қабылдаған шұғыл шешімдері мен нәтижелі іс-қимылдарын қолдайтынын айтты.
Президенттер жоғары деңгейде ықпалдастық орнату және екі ел үкіметтерінің жұмыстарын үйлестіру жайын да келісті. Әңгімелесу барысында Қазақстан мен Өзбекстан арасындағы сауда-экономикалық және гуманитарлық салалар бойынша ынтымақтастықты одан әрі нығайту үшін бірлескен жұмыстарды жалғастырудың маңыздылығы туралы ортақ пікір айтылды.
stan.kz
