Бүгін, 10:07
Тараз қаласындағы гимназиялардың бірінде үзіліс кезінде 10-сынып оқушысы қатыгездікпен соққыға жығылып, ауыр халде ауруханаға түсті, деп хабарлайды kznews.kz.
Зардап шеккен 15 жастағы жасөспірімге шұғыл ота жасалған. Анасы Зухра Каримованың айтуынша, баласының көзі қатты зақымданып, дәрігерлер оны сақтап қалу үшін күрделі операция жасаған. Қазіргі уақытта оның жағдайы ауыр, алдағы 10 күн шешуші кезең болмақ.
Оқиға мектептегі ұлдарға арналған киім ауыстыратын бөлмеде болған. Алдын ала мәлімет бойынша, жасөспірімді 9-сынып оқушылары алдап сол жерге кіргізген. Бейнебақылау жазбаларынан жанжалдың бірден төбелеске ұласқаны байқалады.
Куәгерлердің сөзінше, жәбірленушінің досы көмектеспек болғанымен, оны жібермей ұстап тұрған. Сол сәтте оқушыны бас тұсынан ұрып-соққан. Оқиғадан кейін ол өздігінен бөлмеден шыға алған.
Ауыр жарақат алған жасөспірім қазір кейбір жайттарды есіне түсіре алмайды. Анасының айтуынша, ол шабуыл жасағандардың қолында темірге ұқсас зат болғанын айтқан.
Аталған факті бойынша полиция қылмыстық іс қозғады. Іс “денсаулыққа қасақана ауыр зиян келтіру” бабы бойынша тергеліп жатыр. Күдікті ұсталып, уақытша ұстау изоляторына қамалған.
