7 қараша, 2025
Стамбұлда қазақтың ақыны Табылды Досымовты еске алу кеші өтті, деп хабарлайды kznews.kz.
Егер тірі болғанда, биыл ақын 60 жасқа толар еді. Шарада оның шығармалары топтастырылған «Із тастап аққан бір жұлдыз» кітабының тұсауы кесілді. Кешті Қазақстанның Стамбұлдағы Бас консулдығы ұйымдастырды.
45 жыл өмір сүрген Табылды Досымов қазақ руханиятына терең із қалдырған тұлға. Оның әндері мен жырлары халық жадында әлі де берік орын алып келеді.
Ақынның ұлы Абыл Аяш:
«Әкеміздің әндері Стамбұл төрінде шырқалғанына ерекше толқыдым. Кеш жоғары деңгейде өтті», – деді.
Табылды Досымов атындағы қор директоры Бижан Қалмағанбетов:
«Жастардың әнге қосылып шырқауы – біздің мақсаттың орындалғаны. Табылдының шығармашылығы тәуелсіздік рухымен тығыз байланысты», – деп атап өтті.
Кеш барысында ақын сұхбаттарынан үзінді көрсетіліп, оның танымал әндері орындалды. Түркиялық көрермен Табылды әндерін ыстық ықыласпен қабылдады.
Табылды Досымовтың 60 жылдығына арналған еске алу шаралары Түркиямен қатар Қытай, Моңғолия және Ресейде де өтті.
