13 желтоқсан, 2018
Астана. 13 желтоқсан. KAZISLAM – Дамаск соты «Файлак ар-Рахман», «Хайат Тахрир аш-Шам», «Джейш аль-Ислам» атты бірнеше террористік ұйым басшылары мен мүшелерін сырттай өлім жазасына кесті.
Al-Watan басылымының мәліметінше, сот шешіміне сәйкес айыпталушылар саны 40 содырдан асады, олардың басым көпшілігі Шығыс Гутадан. Олар бейбіт тұрғындардың, оның ішінде әйелдер мен жас балалардың өлімі мен зардап шегуіне алып келген Дамаск аудандарындағы қанды шабуылдарға кінәлі деп танылды.
Өлім жазасына кесілген террористер тізімінде «Хайат Тахрир аш-Шам» тобының көсемі Абу Мухаммад аль-Джулани (шын есімі – Мухаммад Хусейн аш-Шараа), «Джейш аль-Ислам» тобының көсемі Абу Хумам (шын есімі – Исам Бувейдани) және «Файлак ар-Рахман» ұйымының көсемі Абд ан-Насер аш-Шамир бар, деп жазады РИА Новости.
