Өз баласы да әскерде борышын өтеп жатқанын айтқан депутат бұл жағдайға аналық әрі азаматтық тұрғыдан алаңдайтынын жеткізді.
«Әскердегі қатыгездік пен сарбаздардың қаза табуы – жекелеген емес, жүйелік проблема. Бұл тәрбие жұмысының әлсіздігін көрсетеді», – деді ол.
Дементьева мұндай оқиғалар қоғамның Қарулы күштер мен мемлекеттік институттарға сеніміне нұқсан келтіретінін айтып, қорғаныс министрлігінен нақты шаралар туралы сұрады:
«Сарбаздар бейбіт уақытта қашан қауіпсіз болады? Командирлерді осындай жағдайдың алдын алуға қалай дайындайсыздар?» – деді депутат.
Сұраққа жауап берген Қорғаныс министрінің орынбасары Шайх-Хасан Жазықбаев әскерде психологиялық қолдауды күшейту шаралары жүріп жатқанын айтты.
«Жасанды интеллект негізінде әскери қызметкерлер мен олардың отбасыларына көмек көрсететін анонимді Telegram-бот іске қосылды. Әскерге шақырылғандар психологиялық диагностикадан өтеді, ал әскери психологтар біліктілігін арттырып жатыр», – деді ол.
Алайда Мәжіліс вице-спикері Дания Еспаева бұл мәселені тек психологтармен шешу жеткіліксіз екенін айтып, негізгі жұмыс әскери бөлімдердің ішкі тәртібінде жүргізілуі тиіс екенін атап өтті.